Tribal kan ni chungin income tax lamin tihbuai an nei ṭhin - RS MP

Parliament Winter Session neih mekah nimin khan Rajya Sabha MP K Vanlalvena chuan Mizote chu tribal an ni chungin income tax-a thawktute'n an tihbuai luih tlat ṭhin thu a sawi.

K Vanlalvena chuan India Constitution hnuaia Income Tax Act-in a tarlan angin India ram chhunga tribal hnamte chu income tax àwl an nih thu sawiin, "Hemi a nih avang hian Mizo mipuite chu India Constitution-in income tax (chhiah) min àwl a ni. Hetiang a nih mek lai hian Mizo mipui zingah income tax certificate phûtna thuchhuah Income Tax Office, Guwahati, aṭanga hriattirna dawng an awm ṭhin," a ti.

Mizote chu income tax pe ngai lo an nih avang leh tribal an nih avangin income tax awl an nihna certificate te, tribal certificate te chu income tax official-te hnena an entir hnuah pawh income tax official-te hian an la tihbuai zui fo thute sawi chhuakin Rajya Sabha MP chuan, "Hei hi dan kalh a ni," a ti a, Mizo mipui tih buaina a nih thu a sawi.

K Vanlalvena hian Principal Chief Commi­ssioner of Income Tax Office, Guwahati hnenah hriattirna pe tur leh a ṭul dan anga action la turin Rajya Sabha Chairman a ngen nghal.