Phone bo hmuh lêtte a neitute hlân

Lunglei district-a mobile phone bo, Lunglei Police Station-a Cyber Cell-in CEIR portal hmanga an hmuh let 24 chu nimin khan a neitute hnenah hlan lêt a ni.

Mobile phone inhlan letna hun hi Lunglei additional SP K Beihmotaosa leh SDPO H Lunghnema ten an hmanpui a; phone bo, a neitute hnena pek let 24 chu Rs 3,53,174 hua chhût a ni.

K Beihmotaosa chuan, Mizoram chhung leh pawnah mobile phone bo leh rûkbo a tam tih sawiin, "Lunglei PS Cyber Cell chuan CEIR portal kaltlangin, report awm tawh phawt chu a tam thei ang ber chhui chhuahsak zel kan tum," a ti.

Lunglei Additional SP chuan, phone bo zawn chu thil awlai lo tal ni mah se, CEIR portal an hman ṭangkai avang leh Cyber Cell-a thawkte thawhrimna avangin mobile phone bo 194 an hmuh let tawh thu a sawi a; mobile phone secondhand leiah fimkhum turin mipui a chah bawk.