Mizote ngeiin Mizo chanchin an zira an ziah a ngai - Art & Culture Minister

Art and Culture minister C Lalsawivunga chuan Mizo ṭobul chhui chiang tura hmalak mek a nih thu sawiin, chuta tan chuan Mizoram sorkar zau taka a inhawn thu leh, Mizote ngeiin Mizote chanchin an zir chiana an ziah a ngai thu a sawi.

C Lalsawivunga hian nimin khan Mizoram University (MZU) History & Ethnography Department-in 'Beyond Borders and Texts: Reframing the History and Polity of Highlanders in the Eastern Himalayan Borderlands' tih hmanga international seminar an a hawng a ni.

Seminar hawnnaah hian C Lalsawivunga chuan, Mizo chanchin (history) chu mi dangin an lo ziak tawh ṭhin tih sawiin, "Hetiangah hian a nihna dik tak an hre fuh lo fo a, dik tâwk loa an ziah a awm. Mizote ngeiin Mizo history an zir chian a, an ziah ve a ṭul a ni," a ti.

Art & Culture Minister chuan, "Mizoram sorkarin Mizo history zir chian ṭul a tih avangin Art & Culture department hnuaia Tribal Research Institute bultumin Mizo ṭobul chhui tura hmalak a ni," a ti a; Mizo ṭobul chhui tur zingah zirna peng hrang hranga mithiamte an tel thu a sawi.

Mizorama thil hluite chu Mizo history zir chian nan hman ṭul a tih thu sawiin C Lalsawivunga chuan, Art & Culture department-in hma a lak mek thu a sawi a, "Tun hnaia ruhro hmuh chhuah thar ṭhenkhat chu a upat dan hre turin carbon dating tih a ni," a ti.

Mizoram leh a chhehvela chengte hmânlai chanchin zirhona hian ni thum a awh dawn a, mithiamte'n paper an buatsaihte an sawi dawn a ni.