Kuminah Mizo Award hlan leh a ni dawn

Vanglaini chuan kum 2011 aṭangin kum thum danah Mizo zinga hmingṭha leh ram leh hnam tana thawh hlâwk thlan chhuah hnenah Mizo Award a hlan ṭhin a; kuminah pawh a ṭum ngana atan nakzanah Mizo Award hlan leh a ni dawn.

Mizo Award hmasa ber chu kum 2011 khan Brig. Ṭ Sailo hnenah hlan a ni a, kum 2014 khan Sangthankima hnenah hlan niin, kum 2017 khan Dr Joy L Pachuau hnenah hlan a ni. Covid-19 lêng avangin kum 2020-ah Award sem theih a ni lo a, kum 2022-ah Dr Tawnenga hnenah hlan a ni. Mizo Award hian nomawi leh pawisa (cash award) a keng a; cash award hi kum 2011 leh 2014-ah Rs 1,00,000 niin, kum 2017 leh 2022-ah Rs 2,00,000 a ni.

Mizo Award dawng tur thlang tur hian Selection Committee din a ni ṭhin a; Selection Committee-in award dawng tur a thlante hnenah Vanglaini chuan Mizo Award a hlan ṭhin a ni.

Mizo Award 2011 - Brig. T Sailo

Mizo Award hmasa ber dawngtu Ṭhenphunga Sailo hi January 1, 1922-ah Ṭhuampui, Lunglei district-ah a piang a, kum 1942-ah sipai (second lieutenant)-ah ṭangin kum 1966-ah Brigadier-ah a kai a, Mizo zinga sipai Brigadier hmasa ber a ni.

Kum 1974-ah sipai aṭanga châwlin Shillong-ah inbenbel a tum a, mahse, Mizoram buai vanga Mizo mipui mangang thlamuan turin Mizoramah a chuang chhuak ta zawk a, kum 1974-ah Human Rights Committee a din. Human Rights Committee chu March 17, 1975-ah political party (People’s Conference)-ah letin, a hnuah Mizoram People’s Conference tia thlak a ni a; kum 1978 MLA inthlanah a kaihhruai PC party-in sorkarna changin Chief Minister a ni.

June 2, 1978 aṭanga November 10, 1978 thleng CM a ni a; kum 1979 inthlanah PC party chak lehin Chief Minister a ni leh a, May 8, 1979 - May 4, 1984 chhung CM a ni. Kum 1984 inthlanpuiah MLA atan thlan tlin leh ni mah se, a party an sorkar zo lo. Kum 1988 leh 2008 inthlanpuiah MLA atan thlan tlin leh a ni a, kum 2013-ah politics a chawlhsan a, Assembly session-a a tel hnuhnun ber chu July 24, 2013 a ni.

Brig. T Sailo hian ram leh vantlang tana a thawh ṭhat avangin kum 1999-ah Padma Shri a dawng a; ram leh hnam tana a thawh hlawk avangin Vanglaini buatsaih Mizo Award hmasa ber chu April 19, 2011 khan Mizoram Governor Lt. Gen. MM Lakhera-a'n a hlan.

Brig. T Sailo hi March 27, 2015 chhun dar 11:50 khan New Life Hospital, Aizawlah a thi a, a tuk March 28-ah vui a ni.

Mizo Award 2014 - Sangthankima

Sangthankima hi October 18, 1960 khan Tlangsam, Champhaiah a piang a; November 14, 1988-ah Champhaiah fahrah, ruihhlo ngai leh rualbanlote enkawltu Thutak Nunpuitu Team (TNT) a din. A hnuah Zuangtui Muanna Vengah TNT hmunpui a din a, Lunglei, Champhai leh Kolasib-ahte TNT rawngbawlna hmun a din bawk.

TNT hrang hrangah hian fahrah leh riangvai, ruihhlo ngai leh rualbanlo eng emaw zat enkawl tawhin, hlawhtling takin mi tam tak an chhuak tawh a; an rawngbawlna avangin mi eng emaw zatin nunphung pangngai an zawh phah a ni.

Sangthankima hian chawimawina ṭhahnem tak a dawng tawh a, India sorkarin civil mite hnena a pek ṭhin chawimawina sang Padma Shri pawh kum 2024 khan social work huangah a dawng a; university ṭhenkhatin honorary doctorate an hlan nual tawh bawk.

Ruihhlo ngai, fahrah leh riangvai, rualbanlote enkawlna lamah a thawh ṭhat avangin November 29, 2014 khan Mizo Award hmasa ber dawngtu Brig. T Sailo chuan Sangthankima hnenah hian Mizo Award 2014 a hlan a ni.