UDPA Minister-in thil pathum a hawng

10th December, 2025

Urban Development & Poverty Alleviation (UDPA) minister K Sapdanga chuan nimin khan UDPA hmalaknaa din 'Multi-purpose Community Centre' leh 'Aizawl Dawh-Rem' a hawng a; December 8, Thawhṭanni tlai khan UDPA hnuaia Aizawl Smart City Ltd. hmalaknaa din ‘Aizawl Sumtual' a hawng bawk.

Aizawl Sumtual hi Aizawl Smart City Ltd. hmalaknain Mizoram New Secretariat Complex (MINECO)-ah Rs 10,12,65,060 sênga siam a ni a, contractor chu Mizoram Development Agency a ni. September 5, 2023-a hna thawh ṭan niin, November 30, 2025 khan zawh a ni. Intihthawvenna tur thil chi hrang hrang a awm a, mipui tan December 15, 2025 aṭangin tlawh theih a ni ang.

Aizawl Sumtual hi Mizoram Handloom Industry, Tanhril Vengpui TEN kum 2 chhung an enkawl phawt dawn a, thla tin Aizawl Smart City-ah Rs 3,55,555 an chhung lut dawn a ni.

K Sapdanga chuan Aizawl Sumtual ngaihtuah chhuak a, a taka chantirtu Aizawl Smart City Ltd-te thawhrimna fakawm a tih thu a sawi a, "Kan pi leh pute duhthusam sang ber chu pialrala faisa rin a nih ang khan, tunlai ṭhangtharte tan Aizawl Sumtual faisa rin chu thil nuam leh hlimawm tak a ni dawn a ni," a ti.

Aizawl Dawh-Rem chungchangah Minister chuan, a hming ang ngeia inrem tak leh inlungrual taka mipuite’n chawlh hahdam nan leh inkawm hlim nana an hman a duh thu a sawi. Aizawl Dawh-Rem hi Zodin Square-ah cheng nuai 145 sênga siam a ni a, contractor chu LHM Infra, Khatla an ni.

UDPA Minister chuan, Zonuam venga Multipurpose Community Centre din a nih theihna tura ram petu School Education department leh YMA fakawm a tih thu a sawi a, "Sorkar kal tate’n hma an lo lak tawhna a fakawm a, khawtlang hruaitute inpekna leh inlungrualnate a lawmawm. Multipurpose centre a nih ang ngeiin kawng hrang hranga ram leh hnam tana chhenfakawm, inlungrualna leh inpumkhatna thlentu a nih ka beisei," a ti.

Multi-purpose Community Centre hi UDPA hmalaknain Zonuamah cheng nuai 500 sênga sak a ni a, a satu chu ZT Powers, Chanmari an ni.