Thlai thar hralh leh lei chungchangah Buyer Seller Meet 2025 buatsaih a ni

Mizoram Agricultural Marketing Board (MAMB), International Fund for Agriculture Development (IFAD) leh Mission Organic Mizoram te chuan nimin khan Aijal Club-ah ‘Mizoram Buyer Seller Meet 2025’ an buatsaih a, Agriculture & Farmers Welfare minister PC Valalruata'n a hawng.

Agriculture Minister chuan, Mizorama kut hnathawktute tihhma-sawn leh an dinhmun chawikan nana indâwr tawnna ṭha siamsak an nih theih nan MAMB din a nih thu a sawi a, "Mizorama thar sawhthing, aieng, Mizo hmarchate leh hmunphiah te hmun zau zawka hralh chhuah mek zel a ni. MAMB hmalakna leh kut hnathawktute thawhrimnate'n hlawh-tlinna an hmuh theih nana pawimawh tak chu thlai thar lei chhawngtu ṭha leh rintlak neih a ni," a ti.

Thlai thar leitu ṭha neih a nih theihna atan Buyer Seller Meet buatsaih a nih thu sawiin PC Vanlalruata chuan, "Indawr tawnna ṭha a hrin chhuah ngei ka beisei. Aizawl hi rêl hmanga thlun zawm a nih tawh avangin insumdawn tawnna pawh nasa zawka kalpui theih a ni," a ti a; state dangte el pha leh mi dang aia thlai hrisel, thianghlim leh îtawm zawk thar tura ṭan lak a pawimawh thu a sawi.

Khualzahawm C Lalsawivunga, Horti-culture minister chuan, ṭhalai theihna leh thiamna neite'n eizawnna ngêlnghet an neih theih nan Mizoram sorkarin Bána Kaih scheme a kalpui mek thu a sawi a, "Agriculture leh a kaihhnawih thlai leh thei, man man zawka tihral dan tur ṭha ruahmanna tura Buyer Seller Meet buatsaih a ni hi a lawmawm. Mizoram chhunga thlai tharte hi a hriselin a thianghlim bik a ni," ti.

Buyer Seller Meet-ah hian Planning secretary Lalmalsawma Pachuau-in Bana Kaih scheme nihphung tlangpui a tarlang a; sorkarin thlai a thlan pali - sawhthing, aieng, Mizo hmarchate leh hmunphiah tihralna kawnga sorkarin ṭanpuina a pek dan a sawifiah.

IFAD consultant Hanisha Vaswani chuan, Mizorama thlai leh thei thar leh man man zawka tihral dan tura hma an lak theih dan a tarlang bawk.

Buyer Seller Meet 2025-ah hian state pawn aṭangin buyer 40 vel an inziak lut a; Mizorama thar thlai, thei leh a kaihnawih chi hrang hrang phochhuahna stall 50 hawn a ni.