Khuanglenga sawhthing sawngbawlna January 2026-ah peihfel hman tum

Adviser to chief minister (Handholding) Dr KC Lalmalsawmzauva kaihhruaiin nimin khan Planning committee room-ah Khuanglenga sawhthing sawngbawlna hmun (Ginger Processing Unit) bun tura hmalakna kalpui dan thlirlet a ni a; Ginger Processing Unit bun hna hi January 2026-ah peihfel hman tura ruahman a nih thu tarlan a ni.

Ṭhutkhawmah hian sorkar flagship programme Bana Kaih Scheme hnuaia kut hnathawktute thlai thar zinga thlai ṭhenkhat lei leh hralh hna chu sâwt zawka kalpui a nih theih nan Khuanglengah sawhthing sawngbawlna hmun peihfel thui a pawimawh sawi a ni a; nakkum February aṭangin sawhthing lei kalpui leh hman tum a nih avangin Khuanglenga Ginger Processing Plant chu January 2026 chhungin inbunfel hman tura ruahman a nih thu an sawi.

Khuangleng sawhthing sawngbawlna bunna hmun panna kawng metre 270 bawr vela thui sial, zauh leh thawmṭhat hnate, tui litre 1,00,000 dahkhawlna siam te, khawl chi hrang hrang chawm zo tur transformer dahte leh a hmunhma ṭha taka hung a nih theih nana hmachhawp la awmte enho a ni a; heng hmabak la awmte hi January 2026 ral hmaa peihfel hman beisei a nih thu tarlan a ni.

Dr KC Lalmalsawmzauva chuan, December 5-6, 2025-a Mizoram Agricultural Marketing Board (MAMB), Mission Organic Mizoram (MOM) leh International Fund for Agricultural Development (IFAD)-te ṭangkawpin Mizoram kut hnathawktute thlai thar pho chhuahna leh sumdawnpui tur zawnna hun (Buyer- Seller Meet) an buatsaih turah sumdawngte'n Mizorama thar thlai leh thei chi hrang hrang belhchianna hun ṭha an neih theih nan leh insumdawntawnna ṭha siam a nih ngei theih nan ṭan la turin kalkhawmte a sawm.

Thlirletna hunah hian Special Investment Committee on Agriculture & Allied Sector (SICAA) member-te leh Commerce & Industries, Land Revenue & Settlement, Agriculture & Farmers’ Welfare, PWD, PHE, Power & Electricity, IPR leh Tourism department aiawhte an tel a ni.