Infiamna lama ṭhalaite theihna hai chhuahna tur tlangzarh a ni

Mizoram State Sports Council (MSSC)-in infiamna lama inkaih-hruaina mumal zawk a awm theihna tur leh Mizoram pum dâpa ṭhalaite theihna (talent) hai chhuahna tura a duan ‘Empowering Mizoram Sports’ chu nimin khan minister K Sapdanga'n Ramhlun Indoor Stadium-ah a tlangzarh.

Inkhawm hi MSSC secretary Henry C Lalrawnkima'n a kaihruai a; K Sapdanga chuan, Mizote chu infiamna ngaina an nih thu sawiin, "A zei pawh kan zei. Infiamna discipline eng pawh mai hi han hmachhawn phut ila, kan la tih ngai reng reng loh pawh ni se, ni âwm takin kan ti ve mai thei zel. Hetih lai hian, infiamna tehna tak tak inelna khawvelah kan la hniam hle," a ti.

K Sapdanga chuan, national level inelnaah Mizoram hming medal table hnuai lam aṭanga zawn a la ngaih thu sawiin, "Sport ngaina hnam ni si, kan thlen chin la tawi viau si hi a chhan kan dap a ngai. Sorkar awm tawh zawng zawngin infiamna an ngaih pawimawh dan te, infrastructure lama kan sum sen zozaite en hian, hmaih lian tak kan la nei niin ZPM sorkara kan infiamna lam enkawltute chuan an hria," a ti a, infiamna a bulṭhut aṭanga kalpui tum a nih thu a sawi.

Minister chuan, mamawhna hmunah infrastructure din belh dan an ngaihtuah zel dawn thu a sawi rualin, "Infiamna zirna tak tak lian thama kalpui hi he sorkar tum dan leh duh dan a ni. EMS hnuaiah hian kum 8-15 chin mipa leh hmeichhe naupangte'n coach ṭha hnuaiah infiamna zirna an nei thei dawn a, a phûrawm hle. A vision hian a thlir dik hle niin ka hria," a ti.

Empowering Mizoram Sports hnuaiah hian Mizoram hmun hrang hrangah kum 8-15 inkarte basic coaching pek an ni dawn a, coaching hi ni 15 chhung ni tin darkar 3, a vaiin darkar 45 buatsaih a ni ang.

Kum 8-15 inkar tana tih a nih chhan chu, kum 2036-a taksa leh rilru ṭhat vanglai thleng tur an nih vang a ni. 2036 Olympic Games-a India ram aiawha Mizote an tel theihna tur nia ngaih Mizote thiam zawng infiamna chi hrang hrang 24 thlan a ni.