Gorkha-te'n Hari Mandir hlan tura Prime Minister hnena dilna an sût

Mizoram Gorkha Mandir Sanchalan Samiti, Bazar Branch chuan Canteen Kuala Hari Mandir an humhalh zui theih nan an hnena hlan tura Prime Minister an dilna chu an sût.

Chief minister Lalduhoma chuan nimin khan a pisaah Mizoram Gorkha Mandir Sanchalan Samiti, Bazar Branch hruaitute a kâwm a, Canteen Kuala Hari Mandir chungchang a sawipui. Gorkha hruaitute chuan, Prime Minister hnena lehkha an lo thehluh tawh, Hari Mandir humhalh zui tura an dilna chu Mizoram hmasawnna an ngaih pawimawh avangin an sût thu CM an hrilh. PM hnena an lehkhathawn copy pawh CM an hlan nghal a ni.

Hetih lai hian, Hari Mandir hi Aizawl khawpui lailia veng 11-a mite lawina a nih avang leh Mandir-a an bungraw thianghlimte dah zuina tur an mamawh avangin an inkhawm zui zelna tur hmun sorkarin ngaihtuahsak se an duh thu an thlen nghal.

Chief Minister chuan Mizoram Gorkha Mandir Sanchalan Samiti hruaitute chungah lawmthu a sawi a; AR ram chhuahsan enkawl zuina chu Advisory Commmittee kuta awm a nih avangin Hari Mandir sawnna tur chu ngaihtuahho a ṭul tur thu sawiin, "Sawn theihna tur hmunhma remchangte dap tlang ila, a ṭul angin kan sawiho zel dawn nia," a ti.

AR ram Advisory Committee chuan NGO Coordination Committee chu Hari Mandir chungchangah Samiti hotute titipui turin an ngen a, an report pawh Advisory Committee hnuhnung berah khan an pe tawh. An inkawmna kal zelah Samiti hruaitute hian CM an hmu a ni.