Serchhip dist-ah loan rùl ṭha lo 417 awm

Serchhip District Level Committee chuan nimin khan district bawrhsap Paul L Khuma hoin July-September, 2025 chhunga Serchhip district-a bank-te hnathawh dan an thlir let a; priority sector bika loan pûk mi 8,621 zinga mi 417-in an rulh ṭhat loh thu tarlan a ni.

Ṭhutkhawma tarlan danin, Serchhip district-ah hian SBI, MRB, MCAB, Punjab National Bank, HDFC Bank leh NEFSB ten branch an nei a; bank hrang hranga mipuite sum dah (deposit) zat chu nuai 57,432.67 niin, bank-te'n loan an pek chhuah zat chu nuai 42,285.30 a ni. Serchhip district-a bank 19-te CD ratio chu 73.63% a ni a, April-June, 2025 report nena khaikhinin CD ratio tlahniam bank pakua an awm.

Priority sector bikah Serchhip district-a bank hrang hrang aṭanga loan pûk mi 8,621 an awm a, chu'ng zinga mi 417 chuan an rùl ṭha lo a, loan chhia (NPA) tling khawm cheng nuai 939.50 a awm. Bank-te chu thla tin vawi khat tal financial literacy campaign nei tura tih an ni a; Serchhip district-a bank branch-te'n July-September, 2025 chhungin campaign vawi 26 an nei a ni.