Bank-te hmalakna thlir let

November 26 leh 27 khan Kolasib leh Hnahthialah District Consultative Committee leh District Review Committee an ṭhukhawm a; an district ve vea bank hrang hrangte hmalakna leh dinhmun an thlir lêt.

Kolasib DCC leh DRC chu November 26, Nilaini khan DC conference hall-ah an ṭhu a, bawrhsap Robert C Lalhmangaiha'n a kaihruai. July - September, 2025 chhunga Kolasib district-a bank hrang hrangte hmalakna thlirho a ni a; July - September thla chhungin bank-te credit-deposit (CD) ratio chu 61.74% a nih thu tarlan a ni.

Hnahthial DCC, DRC leh District Security Committee chu district bawrhsap K Vanlalruati kaihhruaiin nimin khan an ṭhukhawm. Tarlan danin, kumin July - September chhungin Hnahthial district-a bank awm zingah Mizoram Cooperative Apex Bank-in CD ratio nei sang berin, 99.8% a ni a; Mizoram Rural Bank-in 70.01% leh State Bank of India-in 52.57% an nei bawk.