Feb. 2026 aṭangin sawhthing lei leh dawn

Siaha District Agriculture Marketing Committee (DAMC) chu an chairman VL Hruaizela Khiangte, district bawrhsap hoin nimin khan an ṭhukhawm a; Mizoram sorkarin February 2026 aṭangin sawhthing lei a tum thu tarlan a ni.

Siaha Bawrhsap chuan, tluang tak leh felfai taka Siaha district-a sawhthing thar chhuahte hralh a nih avangin a lawm thu leh a buaipuitute fakawm a tih thu a sawi a, "Loneitute leh official-te zingah hmingchhiatna awm miah loa sawhthing hralh leh buaipui a ni hi a lawmawm tak zet a, kum lo kal leh zel turah pawh thawhhona ṭha tak nena hmalak zel ni se," a ti.

Ṭhutkhawmah hian thil Mizoram sorkarin December 5-6, 2025 chhunga Aijal Club-a Buyer - Seller Meet a buatsaih turah sawhthing chi hnih - thínglaidum leh thíngpui bakah, aieng leh hmarcha pho chhuah an rêl a; buaipuitu atan Agriculture (DAO) leh leh Horticulture (DHO) an ruat.

Siaha district-a sawhthing hralhna secondary collection centre (SCC) pahnih - Siaha leh Tipa SCC-te dinhmun leh an hnathawh dan thlir let a ni a; SCC pahnih hman mekte chu hman zui a rem dawn loh avangin a thar siam ni se, an ti. Supervisor pawh department hrang hranga mi inruat belh an rêl bawk.

Tarlan danin, Mizoram sorkar chu February 2026 aṭanga sawhthing lei tumin a inbuatsaih mek. January - July, 2025 chhungin Siaha district-a SCC pahnih kaltlang hian sawhthing quintal 2,774.09 lei a ni a, sawhthing leina atan Rs 1,38,70,450 sèn a ni. Sawhthingte leite chu hralh leh a ni a, hralhna aṭangin Rs 32,13,799 hmuh a ni.

Siaha district-a sawhthing hralh tam ber Lalpekliana, Siahatla II-in quintal 235.58 a hralh a; pahnihna Lalrammawii, New Siaha West I-in qtl 135.15 leh pathumna Vabeichhuakhu, Zyhno B-in qtl 118.93 an hralh a ni.