Minister-in INTACH, Lunglei Chapter a hawng
Art & Culture minister C Lalsawivunga chuan nimin khan Lunglei Convention Centre-ah Indian National Trust for Art and Cultural Heritage (INTACH), Lunglei Chapter a hawng a; Mizorama INTACH Chapter pahnihna a ni.
INTACH hi kum 1984 khan din a ni a, Delhi-ah hmunpui neiin, India ram hmun hrang hrangah chapter 200 chuang a awm. Kum 1987 khan INTACH Mizoram Chapter din a ni a, tunah Lunglei Chapter din a nih leh tâk avangin Mizoramah chapter pahnih a awm ta a ni. Lunglei Chapter-ah hian member 40 awmin, convener chu Rev. Dr F Sangvela a ni.
C Lalsawivunga chuan, INTACH Mizoram Chapter zarah 'The Mizoram Ancient Monuments and Archaeological Sites & Remains Act, 2001' siam a nih thu sawiin, "He dan tlawhchhan hian pi pu hmun hlui 81 lai chu state protected monument-ah puan a ni. Lunglei district lamah pawh Zosapte leh sap ho sûlhnu te, pi pute sûlhnu hlu tak takte chu humhalh zingah a tel," a ti.
INTACH hmalaknain Mizoram State Protected Monument pathum - Kawtchhuah Ropui (Vangchhia), Ralven Pûk (Vangchhia) leh Lungphun Ropui (Lianpui) te chu National Importance-ah puan a nih tawh thu sawiin Minister chuan, "Ministry of Culture hnuaia Archaeological Survey of India aṭangin a cheiṭhat nan ṭanpuina ṭhahnem tak dawn a ni tawh," a ti a; INTACH chu Mizoram sorkarin a dah pawimawh thu leh Aizawl DC Pisapui kâng chu INTACH duh anga sak ṭhat mek a nih thu a sawi.
Art & Culture Minister chuan, Mizoram sorkarin Mizo hnam ṭobul leh thlangtlâk dan uluk zawka zir leh chhui turin Chief Minister kaihhruai ‘Hnam Ṭobul Zawn Chhuah Committee' din a nih thu a sawi a; INTACH Lunglei Chapter chu Lunglei district leh a piah chhim lam Mizoram chhunga Zo hnahthlak pi pute hmun pawimawh tak takte zawng chhuak a, tu leh fate tan ziaka dah ṭhat a nih theih nan hma la turin a chah.
INTACH Lunglei Chapter hawnnaah hian INTACH Mizoram Chapter member secretary Lalramthanga, INTACH Lunglei Chapter convener Rev. Dr F Sangvela leh secretary JC Vanlal Hmuaka te pawhin thu an sawi a; Lunglei West bialtu MLA T Lalhlimpuia bakah sorkar hotute leh zirlaite an tel a ni.