Governor-in IISF khuhhawnna a hmanpui

India Meteorological Department, Aizawl chuan nimin khan Meteorological Centre, Aizawlah 'Vigyann Se Samruddhi: For Aatmanirbhar Bharat' tih thupui hmanga December 6-9, 2025 chhunga neih tur 'India International Science Festival' (IISF) khuhhawnna an buatsaih a; Governor Gen. Dr Vijay Kumar Singh-a'n a hmanpui.

IISF hi kum 2015 khan hman ṭan a ni a, science pawimawhna leh hmasawn nana chhawr ṭangkai dan turte inzirtir ṭhin niin, kumin hi ṭum 11-na a ni a; December 6-9, 2025 chhungin Chandigarh-ah neih a ni ang.

Governor chuan, India chu khaw awm dan tur hrilhlâwk lama hma hruaitu leh ram tam tak ngaihchan a nih tawh thu sawiin, "Mahni pual satellite siam chhuah bakah, a awmna tur orbit-a dah thei kan ni hi a chhuanawm hle. India hi khawvel puma ni khata start-up ṭan thar ngah ber leh tun dinhmuna nei tam ber pahnihna a ni," a ti.

Science tel loa khawsak leh hmasawn tura hma lam pan a harsat thu sawiin Larsap chuan, zirlai kal khawmte chu science ngaihven lehzual tur leh ram tana thil thar ṭha zawk ngaihtuah chhuah tum turin a fuih a, "IISF hi kût mai ni lo a, khawvel huapa zirbingmi, zirlai, entrepreneur, thil thar thlen duhtu leh mipui nawlpuite hmun khata phuar khawmtu a ni," a ti a; IISF 2025 chuan Mizoramah science ngaihvenna thar thlen se a duh thu a sawi.

Governor hian India Meteorological Department, Aizawl leh Mizoram Science Centre hmunhmate a tlawh a; science tihhmasawn kawngah theihtawp chhuah chhunzawm turin thawktute a chah.

IISF 2025 khuhhawnnaah hian Directorate of Science & Technology principal scientific officer K Lalrammuana leh Meteorological Centre, Aizawl director Sudheer Kumar Dwivedi te pawhin thu an sawi a ni.