KHAWTHLIR

Thisen pe

Nimin khan KṬP, Salem Veng Branch-in ZMCH tan thisen unit 51 an pe a, petute mipa 40 leh hmeichhia 11 an ni a; KṬP, Chawnpui Vengthlang Branch pawhin Synod Hospital tan unit 30 an pe a, petute mipa 26 leh hmeichhia pali an ni. Nimin vêk khan Public Higher Secondary School-in Civil Hospital, Aizawl tan thisen unit 31 an pe a, petute mipa 23 leh hmeichhia pariat an ni.

LADC EVM thliar

Lai Autonomous District Council (LADC)-a member of district council (MDC) inthlanpui vawi 12-na, December 3, 2025-a neih tura hman tur electronic voting machine (EVM)-te chu nimin khan Lawngtlai DC conference hall-ah thliar (commission) a ni. District election officer Donny Lalruatsanga leh election official dangte bakah, political party aiawhte an tel.

Inhlawhna siam

AMC Ward III corporator C Lalchhandami chuan nimin khan a ward chhunga khawsak harsate tan inhlawhna a siam a, mi 102 an inhlawh. Corporator-in inhlawhna a siama thawkte hian Ward III chhunga step leh railing rawng hnawih leh luikawr siam hnate an thawk a ni.

Jubilee hmanpui

Champhai North bialtu MLA H Ginzalala chuan nimin khan Champhai High School golden jubilee lawmna a hmanpui. Ginzalala chuan, zirlaite chu tum sang tak nei tura chahin, zirna chuan dikna kawngah hruai lut se a duh thu a sawi a, "Dikna ṭan tlatte chu a tawpah an dingchhuak ṭhin," a ti.

Dan zirho

Mizoram State Legal Services Authority leh Administrative Training Institute chuan nimin khan Kolasib district-a sorkar department hotute leh thawktute pualin dan zirhona an buatsaih a, thupui chu 'Legal Provisions & Matter' tih a ni.

Kawng khar dawn

Aizawl Traffic SP C Vanlalvena chuan hriattirna chhuahin, Chanmari aṭanga Israel Point via Electric Veng/Lower Zarkawt kawng chu nizan khan siam ṭan niin, December 3, 2025 thleng zan tin dar 9 aṭanga zing dar 5 inkarah siam tum a nih thu leh kawng hi siam a nih chhungin khâr ṭhin tur a nih thu a tarlang.