Zirtir dan changkang leh thar zawkte kalpui a ṭul - Edn Minister

Education minister Dr Vanlalthlana chuan nimin khan Cham-phaia Education training hall-ah headmaster leh zirtirtute training a hawng a; zirtir dan changkang zawk leh thar zawkte kalpui a ṭul thu a sawi.

Dr Vanlalthlana chuan, head-master leh zirtirtute tana training, Post PRS (PARAKH Rashtriya Sarvekshan) a hawnnaah thu sawiin, "Zirtirtute hi naupang leh ṭhalaite rilru hrualtu leh kaihruaitu in ni a, chanvo pawimawh tak in nei. Zirtir dan changkang zawk leh thar zawkte kalpui a ṭul," a ti a; zirlaite'n an zir laite an hriatthiama an vawn theih dan tura zirtir ṭhin turin zirtirtute a chah.

PARAKH assessment-ah Champhai district-in an ti ṭha tawk lo tih sawiin Education Minister chuan, "A pawi hle a, zirna hi ngaih pawimawh hle a ṭul a ni," a ti.

Dr Vanlalthlana hian nimin vek khan Education Training Hal-ah hian 'Meet Your Minister' hun an buatsaih a, sikul naupangte nen inkâwmin, zawhna leh chhanna hunte an hmang.

Zirlaite chu lehkhabu chhiar tam tura fuihin Minister chuan, "Eng lehkhabu pawh in chhiar chuan thiamna leh finna in chhar zel dawn a, taimakna leh tumruhna nen mahni kalna lam zir leh thiam tum a pawimawh. Intihhlimna khawvelah rilru fîm leh ngaihtuahna ṭha neih a ṭul," a ti a; social media chu hmasawn nan hman tum turin a chah.

Education Minister hian Champhai College, Gandhi Memorial Higher Secondary School leh Champhai District Education pisate a tlawh bawk a; thawktute nen an inkawm a ni.