Mizote hi hawihhâwm puih ngaite pui tura inpeih reng an ni - Larsap

Governor Gen. Dr Vijay Kumar Singh chuan November 26, Nilaini khan Raj Bhavan-ah Amazing Namaste Foundation buatsaih India hmarchhak state-te hriat chian lehzual tuma kal, 'New Bike Expedition - Northeast on Wheels' member-te pualin cultural programme a buatsaih a; Mizote chu kawm nuam leh hawihhawm, ṭanpui ngaite pui tura inpeih reng an nih thu sawi.

Governor chuan, New Bike Expedition - Northeast on Wheels member-te chu Mizoram mawi leh nuam takah thinlung taka a lo lawm thu a sawi a, "Mizo mipuite hi kawm nuam leh hawihhawm tak, ṭanpui ngaite pui tura inpeih reng an ni a, Mizoramin khualzin hîp tura theihna nasa tak neiin, kût tlawh manhla tak tak buatsaih ṭhin a ni," a ti.

Amazing Namaste Foundation thil tum chu ropui a tih thu sawiin Gen. VK Singh chuan, Mizoram rawn tlawhtute chu an chenna hmun ṭheuha an kîr hunah pawh Mizoram leh hmarchhak state dangte chanchin mawi leh ṭhate mi dangte hrilh a, rawn kal ve ngei tura hmin turin a chah a ni.

Amazing Namaste Foundation chairman Atul Kulkarni pawhin thu sawiin, mite'n hmarchhak state an hriat chian theih nan Amazing Namaste Foundation chuan kawng hrang hranga hma an lak thu a sawi a; an kalna hmun apiangah a remchan dan ang zela khawtual mite an kawm ṭhin thu leh state sorkarte ṭawiawm ṭhinnaah an lawm thu a sawi bawk.

Inkawmhonaah hian New Bike Expedition - Northeast on Wheels member-te chuan an tawnhriatte an sawi a; Aizawl Thunders, Lushai HOG leh Triumph Mizoram member-te bakah, a kaihhnawih tualchhung mi sawm bikte an tel. Lily Veng Cultural & Drama Club-in hnam lâm an entir a, Raj Bhavan lawn-ah Mizo hnam ziarâng pholanna stall siam a ni.