Siahaah ruihhlo ti mi 30-40 vel awm

Nimin khan Siaha DC conference hall-ah Home minister K Sapdanga hoin ruihhlo do beihpui thlakna, Operation Jericho hmanga hmalak tawh dan leh hmalak zel dan turte sawiho a ni. Minister chuan, Siaha khawpuiah damdawi ruihhlo ti ṭhin mi 30 leh 40 inkar vel an awm mek thu a sawi.

Home Minister chuan, "Siaha khawpui chhungah ṭhalai mi 30 leh 40 inkar drug user an awm mek a, district dang aiin ruihhlo bâwiha tâng an tlem nia a hriat a ni. Ruihhlo hman sualin a ken tel HIV chungchangah pawh hmalakna a ṭha hle niin ka hria," a ti.

K Sapdanga chuan, Siaha district-ah ruihhlo doa theihtawp chhuahtu Police, Excise & Narcotic, tlawmngai pawlte hmalakna leh Bawrhsap hmalakna fakawm a tih thu a sawi a; Siaha district chu ruihhlo ngai awm lohna district a ni theih nan ṭan la lehzual turin kal khawmte a fuih.

Siaha SP Manny Bushan Singh chuan an district-a Operation Jericho an kalpui dan tarlangin, Siaha district chu Myanmar ram rîtu ni mah se, ruihhlo lut a tlem tawh thu a sawi a, "Myanmar lamah pawl ṭhenkhatte'n drug tawlhruk an khuahkhirh ṭhat avangin Mizoram chhung aṭanga ruihhlo lut tur kan ven uar zawk," a ti a; Siaha district chinah hmun pathum - Tlangpui, Tuipui Ferry leh Kawlchaw-ah te check gate siam a nih thu a sawi.

Operation Jericho kalpui a nih hnuah Siaha district-ah heroin gram 30.92 man a ni tawh a, chumi kaihnawihah chuan mi pahnih man an ni. Khuh damdawi (cough syrup) bûr ruk, zu litre 48.5, zu chhuan tur ṭîn 280 leh bel 11, beer bûr 18 man a ni tawh a; MLP Act hnuaiah thubuai 21 ziah luh tawh a ni.

Nimina ṭhutkhawmah hian Siaha bawrhsap VL Hruaizela leh department hrang hotute an tel a; Mara Thyutlia Py hruaitute'n ruihhlo donaa an hmalakna dan an sawi bawk.