Lurh Tlang Vavu Sanctuary hawn a ni

November 21, Zirtawpni khan Farkawn Village Council, All NGO’s, Farkawn leh Conservation Mizoramte hmalakna a din ‘Lurh Tlang Vavu Sanctuary, Farkawn’ chu Champhai DFO Lalbiakchama'n a hawng.

Champhai DFO chuan Mizoram state bird Vavu chu kan ramah a tlem tawh thu sawiin, "Farkawn khuaten an humhalh hi a lawmawm hle. Department, mipui, conservation NGO-te hmalak hoa, humhalh hna ṭha tak a thawhho zel a pawimawh. Lurh Tlang chhehvel hi dan hmanga humhalh tlat a ni," a ti.

Lurh Tlangah hian Mizoram state brd, Vavu-te hi an population a ṭha pangngai hle a hriat a ni a, kumin May – September inkara chhinchhiah theih zat chu a puitling 20 (a pa pariat 8 leh a nu 12) leh a note pariat an ni.

Heng lo pawh hi Bualpui tlangdung leh Lurh kawng chung tlangdungahte pawh hmuh ṭhin an ni. Khawtlang hruaitute leh Conservation Mizoramte’n a humhalh hna thawkin, zirchianna kalpui mek zel a ni a, Vavute hi nungcha mang mai hlauhawm dinhmuna ding mek niin, humhalh ngai tawh tak an ni.

Lurhtlang Vavu Sanctuary, Farkawn hi Sanctuary Managing Committee-te’n mumal taka enkawl tura ruahmanna siamin, inkaihhruaina fel tak siam a ni. A tlawhtu turte’n Sanctuary Managing Committee te biak hmasak zel a ngai.