Hnahlan ramah Vanapa lung an phun

Mizo pasalṭha hming­thang Vanapa (Thangzachhinga) hriatreng nan Vanapa Thlân Sub-Committee chuan nimin khan Hnahlan rama Tuiṭhoh lui kamah hriatrengna lung an phun a, Art & Culture deputy director Lal­chuailova'n 

a hmanpui. 

Vanapa Thlân Sub-Committee chuan, Vanapa thlân lung phunnaah hian a tuchhuan kal zelte an tel thu leh, lung an phunna chu Vanapa ruang zalhna hmun a nih thu an tarlang. Art & Culture Deputy Director chuan, mi huaisen leh tlawmngai Vanapa hriat rengna lung phun a ni chu lawmawm a tih thu sawiin, "Vanapa chanchin leh a thihna hmun, a thlân hi chhui dan hrang hrang awm mah se, kan innghahna leh kan rin ber tur chu, kum 1926-a Mizo leh Vai Chanchin-a ziaka awm leh, Mizo historian Pu B Lalthangliana ten ziak ngeia an lo dahte hi a ni," a ti. 

Vanapa tuchhuan zinga mi C Ṭhasiama, Bawngkawn chuan, "Kan pu, Vanapa thlan awmna hmun hi mi thiam tam takte'n a hmun an sawi dan inang lo mah se, kan chhungkaw thu rochhiaha kan inhlan chhawn zelah chuan, 'Hnahlan ram, Tuiṭhoh lui kam' tih hi a ni," a ti a; chutih rualin, Tuiṭhoh lui awmna tak an hriat loh avangin an pu thlân hmun an hre thei mai lo a, Hnahlan khawtlanga tlawmngai pawlte'n an zawn hmuhsak chu lawmawm an tih thu a sawi.