MLA atan Dr R Lalthangliana la lut

Dampa bial by-election neih zawh tâka MLA atana thlan tlin Dr R Lalthangliana, MNF senior vice president chu nimin khan Assembly speaker Lalbiakzama'n MLA atan rinawmna thu tiamtirin a la lut.

Lak luh inkhawm hi Assembly Confe­rence Hall-ah hman niin, Assembly addi­tional secretary Lalthang­mawia'n a kaihruai a, Dr R Lalthan­gliana chu Speaker-in rinawmna thu a tiamtir a ni. Speaker chuan, "Dr R Lalthangliana, Dampa bial aṭanga MLA atana thlan tlin tak chu 9th Mizoram Legislative Assembly-ah ka lo lawm lut a, legislator ṭha tak ni turin duhsakna ka hlan e," a ti a; lak luh inkhawm tihtawp zui a ni.

MLA lak luhnaah hian chief minister Lalduhoma, minister pathum - K Sapdanga, Lalrinpuii leh Dr Vanlalthlana, Assembly deputy speaker Lalfamkima, opposition leader Lalchhandama Ralte leh MLA eng emaw zat an tel.

Dr R Lalthangliana hi November 11, 2025-a Dampa bial by-election-ah MNF ticket-a dingin, MLA atan thlan tlin a ni a, MLA atana thlan tlin a nih vawi sarihna a ni. Kum 1989 khan Lunglei North bialah MLA atan thlan tlin a ni a, Lunglei North bialah vêk kum 1993, 1998 leh 2003 khan a záwnin thlan tlin leh a ni a; kum 2008-ah Lunglei West bialah leh kum 2018-ah South Tuipui bialah thlan tlin a ni bawk. Kum 1998-2008 chhung leh kum 2018-2023 chhung minister a ni.

R Lalthangliana hi August 6, 1956-ah Lunglei Zotlangah a piang a, kum 1982-ah Ngurmawii Sailo nen inneiin fapa pahnih an nei. An chhungkuain Kanan Veng, Aizawlah an chêng mek.