2025-ah Aizawl dist-ah police thubuai 1,565; Sairang station aṭangin ILP 12,227 pe tawh

Aizawl SP H Zosangliana chuan, kumin 2025 chhungin Aizawl district-a police station hrang hrangah thubuai 1,565 ziah luh a ni tawh a, Sairang rél chawlhhmun aṭangin Inner Line Permit (ILP) 12,227 pek chhuah a nih tawh thu a sawi.

Aizawl SP thar hian nimin khan MJA office bearer-te a pisaa léngah sáwmin, thingpui a inpui a; H Zosang-liana chuan, Mizoram Police leh chanchinbumite ṭha takin an thawkho tawh ṭhin tih sawiin, "Hma hun zelah pawh thawhhona ṭha tak neih zel kan duh a, thurawn leh in finchhuahna kan dawng thei reng a ni," a ti.

H Zosangliana chuan, kumin chhungin Aizawl district-ah police-te'n thubuai 1,565 an ziak lut tawh tih sawiin, "Thubuai ziah luh zingah inrawk leh rûkrûk a tam ber a, 66% vel a ni a, rûkrûk thubuai zinga 10% chu lirthei rûk thubuai a ni," a ti a; Aizawl district-a thubuai ziah luh zat chu Mizoram puma thubuai ziah luh aṭangin 66% vel a nih thu a sawi.

Kumina thubuai ziah luh tawh zinga 58% chu court-ah chargesheet thehluh tawh a ni tih sawiin Aizawl SP chuan, "Chargesheet kan thehluh tawh aṭangin court-in thubuai 419 a chingfel tawh a, thubuai 381-ah dan bawhchhetute thiam loh chantir an ni a, hei hi 90% a ni," a ti.

H Zosangliana chuan, Aizawl district-a police station hrang hrangin chawlhkar tin hnam dang awmte an endik ṭhin thu sawiin, "Kumin chhungin ILP checking vawi 67 neih a ni tawh a, ILP dan bawhchhia mi 759 man an ni tawh," a ti a; ngawrh lehzualin hnam dangte enfiah zel a nih dawn thu a sawi.

Aizawl SP tarlan danin, Sairang rel chawlhmunah September 14, 2025 aṭangin Mizoram Police an duty ṭan a, rel hmanga Mizoram pawn aṭanga hnam dang rawn lut mi 12,227 hnenah ILP pek chhuah a ni tawh. Thla tina ILP pek chhuah dan chu - September 2025-ah 2,610, October-ah 6,734 leh November-ah ni 14 chhun dar 12 vel thlengin 2,883 a ni.

Sairang station-ah ILP counter pali a awm mek a, police 14 an awm mek; police 15 dah belh tum mek a ni. Sairang chawlhhmun aṭang hian police-te'n state pawn aṭanga kutdawh rawn lut mi 22 an thawn lêt tawh bawk.

Aizawl SP chuan, police hna pawimawh tak chu sualna thleng ṭhin ven a nih thu sawiin, "Crime prevention kan ngai pawimawh em em a, kan indaih lo chungin theihtawp kan chhuah. Zan tin patrol team 10-ah ṭhenin khawpui chhung hmun hrang hrangah foot patrolling neih ṭhin a ni a, hmun ṭhenkhatah chuan prison van-te chhawpin duty kan indah ṭhin," a ti.

Khawpui chhung kawngpui sir vela ruihhlo ti ṭhinte leh hralh ṭhinte an vai ṭhin thu sawiin H Zosangliana chuan, "Ruihhlo ti ṭhinte nunau tan hmuh hrehawm theia an awm hi ṭha kan ti lo a, thenfai hna theihtawpin kan chhuah," a ti a; khawlaia ruihhlo ngaite chu khâwm ṭhin mah se, dahna tur a awm loh avangin harsatna an tawh ṭhin thu a sawi.

Aizawl SP chuan, Mizoram Police-in mipui hnena dan pawimawh zualte zirtir a ngaih pawimawh thu sawiin, "Aizawl district police chuan mipuite hnenah dan leh thupek chungchangah inzirtirna a buatsaih ṭhin a, sikul leh college bakah, sunday school-ahte kum 2025 chhungin awareness programme vawi 15 buatsaih a ni tawh," a ti. Drug awareness campaign a buatsaih ṭhin thu a sawi bawk.

Inkawmnaah hian MJA hruaitute hi president C Lalram-buatsaiha hoin an tel a; media-te leh police-te inkungkaihna leh thawhhona ṭha zawk a awm theih dan tur leh police hmalakna atana ṭha tur nia an hriatte an sawi a ni.

Aizawl District Executive Force-ah hian sub-division pathum - Aizawl South, Aizawl North leh Sakawrdai awm mekin, Sub-Divisional Police Officer (SDPO)-te'n an enkawl. Police station pakua - Aizawl, Bawngkawn, Kulikawn, Vaivakawn, Sairang, Sialsuk, Darlawn, Sakawrdai leh Women PS a awm a; outpost pahnih - Zonuam leh Selingah a awm. Bpat Post pathum - Bazarpui, Bethlehem Vengthlang leh Salem Vengah a awm bawk.