Dengue vei 1,846 hmu tawh, mi 1 thi

Mizoram hmun ṭhenkhatah dengue a hluar mek a, kumin 2025-ah January aṭanga November 10 thlengin dengue vei mi 1,846 hmuh chhuah tawh niin, dengue vangin mi pakhat a thi tawh.

State Vector Borne Disease Control Programme (SVBDCP) chuan nimin aṭang khan ATI Auditorium-ah Aizawl Municipal Corporation (AMC) chhunga local council member-te pualin dengue chungchang zirhona an buatsaih. LC 87 aṭangin member pahnih zel ko khawm an ni a, dengue natna chungchang leh inven dante an inhrilhfiah bakah, dengue tirêm tura thawhho dan tur sawiho a ni.

SVBDCP hotute sawi danin, January 1 - November 10, 2025 chhungin Mizoramah dengue vei leh vei hriat nan mi 27,950 endik a ni a, chuṭng zinga mi 1,846 chuan dengue an vei tih hmuh chhuah a ni. Kuminah dengue vangin mi pakhat a thi. Kumin 2025-a dengue vei hmuh chhuah 1,846 zinga 975 (52.82%) chu AMC huam chhunga mi an ni.

Zirhonaah hian kaihruaitu Vector Borne Disease state programme officer Dr Lalzawmi'n Mizoram leh India rama dengue dinhmun tlangpui a tarlang a; SVBDCP consultant pahnih Malsawmtluangi Pachuau leh Deborah Lalpuii bakah, state entomologist Dr Lalfakzuala Pautu ten dengue chungchanga hriat tur pawimawhte an hrilfiah. Health Services joint director Dr PC Lalhmingliana kaihhruaiin zawhna leh chhanna hun hman a ni bawk.