Serchhipah dawr bungrua a thih leh thih loh endik ṭhin dawn

Serchhip District Consumer Protection Council chuan nimin khan district bawrhsap Paul L Khuma kaihhruaiin Serchhip district mipui tana himna tur kaihhnawih hrang hranga hmalak dan tur an rêl a; dawr bungraw thi (expire) tawh zawrh a nih leh nih loh an endik ṭhin dawn.

Ṭhutkhawmah hian Serchhip district chhunga dawr hrang hrangah bungraw thi (expire) tawh zuar an awm leh awm loh endik ṭhin an rêl a; Food & Drugs Administration, police, Consumer Union leh Legal Metrology ten hma lo la se, an ti.

Ei rawngbawlna gas sem (home delivery) chungchanga harsatna mipuiin an tawh dan tarlan a ni a; District Civil Supplies Officer chu gas agency manager leh delivery boy-te November 2025 kar tawpah ṭhutkhawmpui turin an ruat.

Serchhip khawpui chhung bazar hnuaia parking fee khawn chungchang sawiho a ni a; mipuiin awareness an neih theih nan lirthei dah man (rate) mumal taka tar chhuah ni se, Conumer Union lamin lo bawhzui se, an ti bawk.