Aizawl dist-ah sawhthing SCC din belh rêl

Aizawl District Agriculture Marketing Committee (DAMC) chuan nimin khan an chairman Lalhriatpuia, district bawrhsap kaihhruaiin felfai leh sâwt zawka sawhthing lei leh hralh kalpui a nih theih nan Chamring leh Zuangtuiah secondary collection centre (SCC) din belh an rêl.

Ṭhutkhawmah hian Aizawl district-a RD block hrang hranga sawhthing lei leh hralhna hmanpui (SCC) dinhmun thlir let a ni. East Phaileng, Thingsulthliah, Aibawk leh Sairanga sawhthing lei leh hralh dan dinhmun thlir letna aṭangin Sairang SCC chu ṭhiah a, Zuangtuia SCC din belh leh, Aibawk SCC chhâwk zângkhài turin Chamringah SCC din belh an rêl a ni.

Felfai leh mumal zawka SCC kalpui a nih theih nan SCC enkawl tur thlannaah sawhthing thar tam khuate chu nasa zawka inhmang lehzual tura ruahman ni se, an ti. Mizoram Agricultural Marketing Board ruahman angin DAMC ṭhutkhawmnaah hian sorkar hnathawk lai aṭangin SCC hruaitute thâ tichak tur leh puitu tur SCC supervisor ruat dan tur an rel a, supervisor mawhphurhna leh an hnathawh dan turte an sawiho bawk.