Traffic SP leh MJA hruaitute inkâwm; Jan-Oct 2025 chhungin lirthei 7,864 man

Aizawl Traffic SP thar C Vanlalvena sàwm angin MJA hruaitute chu nimin khan SP pisaah an léng a, thawhho dan tur an sawiho. Traffic SP chuan, kumin January aṭanga October thla thlengin Aizawlah lirthei dan bawhchhia 7,864 an man tawh thu a sawi.

C Vanlalvena chuan, January-October 2025 chhungin Aizawlah lirthei dan bawhchhia 7,864 man a ni tawh tih sawiin, "Dan bawhchhiate sum chawi tling khawm chu Rs 69,95,900 a tling. Dan bawhchhia man zingah no parking-a lirthei dah an tam ber a, no entry bawhchhia te, wrong side-a tlan te, trafiic flow tibuai khawpa lirthei khalh leh driving licence nei loa lirthei khalhte chu kan man tam zual an ni," a ti.

Tun hma aṭangin Aizawl traffic police leh MJA ten thawhhona ṭha tak an nei ṭhin tih sawiin C Vanlalvena chuan, khawpuia lirthei che vel enkawl leh lirthei dan hrang hrang zawm tura mipui zirtir kawngah MJA-in theihtawp a chhuahpui ṭhin chu lawmawm a tih thu a sawi a; MJA thawhhona ṭha an neih zel a beisei thu sawiin, theihtawp chhuahpui zel turin a ngen.

Traffic SP chuan, mihring leh lirthei pung zelah Aizawla lirthei che vel enkawl a hautak sâwt hle tih a sawi a, "Traffic police-te'n theihtawp kan chhuah ve a, mahse, mipui duhthusam leh beisei ang tlin tâwk lohna kawng tam takin kan nei thei. Mipui pawhin duty-te thu an awih zel a pawimawh," a ti.

Traffic police-te'n theihtawp an chhuahna zarah tun hnaiah Aizawla traffic enkawl ṭha lawmman Mizoram (UDPA department)-in sorkar laipui aṭanga a dawng chu an lawm thu Traffic SP chuan a sawi bawk.

Inkawmnaah hian MJA president C Lalrambuatsaiha leh MJA hruaiutu leh member dangte pawhin an ngaimawh zawng leh ngaih pawimawhte an sawi a ni.