KHAWTHLIR

KṬP-in thisen pe

KṬP, Zotlang Branch chuan nimin khan Synod Hospital tan thisen unit 34 an pe a, petute mipa 29 leh hmeichhia panga an ni.

Crop insurance zir

Agriculture & Farmers’ Welfare department chuan nimin khan an Directorate Committee Room-ah ni hnih awh tur Crop Insurance Scheme (PMFBY) chungchang inzirtirna an buatsaih ṭan a; Central Project Management Unit, New Delhi-a mithiam pahnihte'n online hmangin thil pawimawh an zirtir. Training hi Agriculture director R Lalnunzira'n a hawng a; Agriculture leh Horticulture department-a officer-te leh technical staff-te'n an chhim a ni.

NEP 2020 zirho

Mizoram Board of School Education chuan nimin khan Champhaia Educational Training Hall-ah high school leh higher secondary school zirtirtute tan National Education Policy chungchang inzirtirna an buatsaih a, MBSE chairman JH Zoremthanga'n hmanpuiin, zirtirtu 51 an tel. NEP 2020-a thil pawimawh hrang hrangte inhrilhfiah a ni.

Pipe siam dawn

Traffic SP C Vanlalvena chuan hriattirna chhuahin, PHE-in Khatla Peter Street (TBL bul)-ah pipe an siamṭhat dawn avangin November 16, Pathianni-ah zing dar 9 aṭanga tlai dar 5 thleng kawng chanve khâr a nih dawn thu a tarlang. Kawngpui hmangtute chu fimkhur tak leh hnathawktute ngaichang chunga lirthei khalh tura hriattir an ni.

LADC-ah mi 21-in nomination thehlut

Lai Autonomous District Council (LADC) inthlanpui December 3, 2025-a neih turah nimin khan mi 21-in returning officer pathum hnenah nomination an thehlut. Nimina nomination thehlutte hi ZPM candidate 12, Congress candidate panga, MNF candidate pakhat leh independent-a ding tur mi pathum an ni. Nomination thehluh theih hun hi vawiin tlai dar 3 thleng hawn a ni ang.