Mizoram tourism hmasawnna tur sawiho

Tourism minister Lalnghinglova Hmar chuan nimin NITI Aayog member Dr VK Paul chu New Delhi-a NITI Aayog Headquarters-ah a kawm a, Mizoram tourism hmasawnna tur atana hmalakho dan tur an sawi.

Lalnghinglova Hmar chuan tun hnaiah Mizoram tlawhtu an pung nasa tih sawiin, Sairang thleng rel a luh hnuah phei chuan Aizawla hotel leh homestay-te pawh khualzinin an luah khat ṭhin hle tih a sawi a, "Mizoramin pho chhuah tlak hmun mawi leh nuam tak tak kan nei a, heng hmunte hmanga tourist hip lut tur chuan a khawtual mite'n kan hlut a, kan tlawh hmasak a ngai. Hemi kawngah tun hnaiah nasa takin hma kan sawn a, a lawmawm hle a ni," a ti.

Mizoram tourism hmasawn nana NITI Aayog leh Mizoram sorkar hmalakna tur sawiho zingah Mizoram Tourism Conclave buatsaih a tel a; stakeholder tam zawk an tel theihna tur leh, Mizoramin a hlawkpui theih tura ruahmanna siam ni se, an ti a; hmalatu tur 'Task Force' din a, a ranglama a hun tihchian theih ni se an ti. New Delhi-a 'Mizo Day' hman chungchang an sawidun bawk.

Sorkar thuchhuah tarlan danin, NITI Aayog leh Mizoram sorkar ṭangkawp chuan November 24, 2025-ah Mizoram sawhthing thar chhuah chungchanga inrawnkhawmna 'Stakeholder Consultation on Ginger Produce for Mizoram' tih chu New Delhi-ah neih a ni dawn a; he hun hi Mizoram Chief Minister-in a telpui dawn.

Sorkar official bakah industry, zirna-in leh organisation a tam thei ang sawm an ni dawn a, hemi zulzuia sector dang - a bikin tourism-a programme siam chungchang ngaihtuah ho a ni bawk ang.

Tourism Minister hi Tourism secretary Vanlaldina Fanai, Delhi Mizoram House residential commissioner Alexander V Chongthu leh Tourism director R Lalrodingite'n an ṭawiawm a, Tourism Secretary hian Mizoram tourism dinhmun tlangpui a lem nen a sawifiah.