Mizoram tan DYO pe dawn

Sports & Youth Services minister Lalnghinglova Hmar chuan nimin khan New Delhi-ah sorkar laipuia Youth Affairs secretary Pallavi Jain Govi a kawm a; Youth Affairs Secretary chuan UPSC kaltlanga District Youth Officer (DYO) 190 an lak mek aṭangin Mizoram hnenah DYO tur pek a nih tur thu a hrilh.

Lalnghinglova Hmar hian Ministry of Youth Affairs & Sports kalpui Mera Yuva Bharat (MYB) hnuaia Mizorama indaih lohnate Youth Affairs Secretary hnenah hian a thlen a; Mizoram district 11 zinga pariatah MYB-in district office an neih thu te, tun dinhmunah DYO pali chauh an awm thu leh, accountant leh multi-tasking staff (MTS) pakhat ve ve chauh an awm thu a sawi a ni.

Pallavi Jain Govi chuan UPSC kaltlangin DYO 190 an la mek tih sawiin, DYO awm lohna district 420-ah an semrual dawn thu leh Mizoram pawh an pek tur thu a sawi a; accountant leh MTS-te pawh agency kaltlanga an lak tur thu leh tun aṭanga rei loteah Mizoramah pawh an post tur thu Sports Minister hi a hrilh.

Lalnghinglova Hmar chuan Luangmual, Aizawla Youth Hostel chu a ram neitu nih inchuhna a awm mek a, Mizoramah Sairang thleng rel a luh tawh avanga khualzin an pun bawk avangin Youth Hostel thar mamawhna a san thu leh a ram tur chu state sorkarin a neih theih tur thu a sawi a; Youth Affairs Secretary chuan Mizoram sorkarin lehkha pawimawhte a thehluh hunah hma an lak thuai tur thu leh, Mizoram chungchang chu ngaihpawimawha an neih tur thu a lo hrilh a ni.