KHAWTHLIR

ṬKP-te'n thisen pe

November 8, Inrinni khan ṬKP, Bawngkawn Unit chuan Synod Hospital tan thisen unit 31 an pe a, petute mipa 27 leh hmeichhia pali an ni a; ṬKP, Hnahthial Bazar Bial pawhin Lunglei Civil Hospital tan unit 52 an pe a, petute mipa 37 leh hmeichhia 15 an ni.

Duty-na tur pan

Dampa bial by-election naktuk Thawhlehnia neih turah polling station 41 zinga a hla zual paruka duty tur polling party-te chuan nimin zing khan an duty-na hmun tur an pan a, chungte chu - Zopui, Silsury-I, Silsury-II, Silsury-III, Hnahva leh Lianbuang te a ni. Polling station 35 danga duty turte chuan vawiin hian an duty-na hmun tur an pan ve leh ang.

Nihna tichiangtu atana hman theihte

Mamit district election officer K Laltlawmlova chuan, naktuka Dampa bial by-election-a vote thlak tura lehkha pawimawh ken ngaite a tarlang a; voter identity card, Aadhaar card, Indian passport, MGNREGA job card, bank passbook, driving license, PAN card, health insurance smart card, NPR hnuaia RGI pek chhuah smart card, pension document, sorkar hnathawk leh PSU hnuaia thawkte tan service ID, MP/MLA/MLC hnena pek official ID, UDID card te hman theih a ni.

Thuthlung ziak

Mizoram Cooperative Apex Bank leh Common Service Centre (CSC) e-Governance Services India Ltd. te chuan November 7, 2025 hian thawhhona thuthlung an ziak. Thuthlungah hian Apex Bank aiawhin chief executive officer A Lallungmuana'n hming a ziak a, CSC e-Governance Services India aiawhin principal consultant Mohammed Azeez Udin chuan hming a ziak. MoU angin Apex Bank hnuaia business correspondent-te chu CSC-in an enkawl tawh dawn a ni.

Dan inzirtir

Kawrthah Forest Division hnuaia field staff-te pualin tun hnai khan Kawrthahah ‘Capacity building workshop for the frontline field staff’ buatsaih a ni. Kawrthah ACF Andrew Lalthlamuana'n The Bharatiya Nagarik Suraksha Sanhita 2023, Wildlife (Protection) Act 1972 leh Mizoram Forest Act 1955 chungchang a zirtir a ni.