Dampa bialah campaign hun a tàwp

Dampa biala MLA by-election chu naktuk Thawhlehni-ah neih a ni dawn a, zing dar 7 aṭangin vote thlak ṭan a ni ang. Nimin tlai dar 4 khan inthlan atana campaign hun a tawp a, Dampa bial pawn lam aṭanga campaigner-te chu bial chhung chhuahsan vek tawh tura tih an ni.

Mamit district election officer K Laltlawmlova, bawrhsap chuan, campaign phal loh hun chhung (silent period)-ah political party leh candidate te campaign phal a nih tawh loh thu leh, Dampa biala vote nei lote chuan Dampa bial chhuahsan vek tur a nih thu a tarlang.

Mamit DEO chuan, "Aurinna hman phal a ni tawh lo a, electronic media/social media leh a tlukpui dangteah inthlan kaihhnawih, mipui rilru sûkthlêk tidanglam thei thilte tarlan/chhuah phal a ni lo. Dan zawm lote chu kum hnih thleng lung-in tàn emaw, pawisa chawi emaw, pawisa chawi leh lungin táng tura hrem theih an ni," a ti.

Vote thlak ni November 11 leh a hma ní November 10-a chanchinbu (print media)-a political advertisement chhuah turte chuan Media Certification & Monitoring Committee (MCMC)-te phalna lak tur a nih thu tarlangin DEO chuan, "Candidate emaw, party tinte'n chi leh chi, sakhuana, hnam leh hnam, etc. inkar boruak tichhe thei lam hawiin eng mah tih loh tur a ni. Political party dangte sawiselna neih a nih pawhin party policy, tun hma huna an hnathawh dan (past record and work) lam hawi chauh tih tur a ni," a ti a; mimal nun tibawrhbâng leh timualpho zawng leh, mimal thil (personal life) chungchangah inchirhtheh loh tur a ni tih a tarlang.

Mamit DEO tarlan danin, silent period chhungin vote hmuh theihna tura chi leh chi inkar boruak (communal feeling) tichhuak zawnga thil tih phal a ni lo a, sakhaw hmunte chu inthlan kaihhnawih thil puanzarna atan hman phal a ni lo.

Silent period chhungin flying squad, static surveillance team leh team dangte'n dan bawhchhiatna a awm leh awm loh an enfiah reng dawn a; MCMC-in media leh social media-te ngun takin an vil reng dawn bawk a ni.