Reiek tlang tihfai hnatlang huaihawt

Mizoram State Legal Services Authority (MSLSA) chuan nimin khan Reiekah faina hnatlang (cleanliness drive) an buatsaih a, Gauhati High Court chief justice Justice Ashutosh Kumar-a'n a hmanpui.

Justice Ashutosh Kumar chuan, leilung leh a chhunga awmte chu mihringte ta a ni lo a, mihringte chu a enkawltu chauh an nih thu a sawi a, "Thianghlim leh ṭha taka a awm reng theih nana enkawl hi kan mawhphurhna a ni,” a ti. Mizote'n ramngaw nuam leh ṭha tak, boruak thianghlim tak an nei tih sawiin, ramngaw leh nungchate ṭha taka humhalh tur leh faina leh thianghlimna kawngah theihtawp chhuah zel turin hnatlanga telte a chah.

Cleanliness drive-ah hian Gauhati High Court judge pahnih - Justice Michael Zothankhuma leh Justice Nelson Sailo te pawh an tel a; MSLSC member secretary Vincent Lalrokima leh Gauhati High Court Mizoram Bench-a officer dangte an tel bawk.

Faina hnatlang hawnna inkhawm hman zawhah Reiek tlanga bawlh-hlawhte an thian fai a ni.