MST bus tlai chhan - traffic jam; Bus chhuah hun sawn hma a ni

Transport department chuan thuchhuah siamin, November 1, Inrinni tlaia MST bus-in Sairang aṭanga réla zin tur a phurhte a tlaipui chhan chu traffic jam nasa lutuk vang a nih thu an tarlang a; Guwahati kal tur bik tan Transport complex aṭanga MST bus chhuah hun chu darkar khatin an sawn hma nghal.

Transport department chuan, Sairang rel chawlhhmun leh Aizawl inkara veivahnaah khualzinte'n harsatna an tawh loh nan September 29, 2025 aṭangin MST bus tlantir a nih thu an tarlang a, "Kan passenger phurhte hi a hun takah, tlai loin phurh thlen vek an ni ṭhin a, hetiang a nih laia November 1, 2025-a Guwahati kal tur passenger-te MST bus-in a hun taka a thlenpui thei lo hi department chuan pawi a ti hle a ni," an ti.

MST bus ticket chu ni sarih hma lam aṭangin lak lawk (advance booking) theih a nih thu tarlangin Transport department chuan, "Hetiang a nih avang hian a hunbi dik tak (departure time) a thlen

hma chuan an chhuak ngai lo. "November 1, 2025 hian Transport Complex, Chaltlang aṭangin tlai dar 5-ah a chhuak a, zan dar 7-a rêl chhuak a nang hman ta lo a, hei hi a chhan ber nia lang chu traffic jam nasa lutuk vang a ni," an ti a; passenger-te chungah ngaihdam an dil.

Transport department hotute chu an inhmukhawm nghal a, bus a thlen tlai tawh loh nan Guwahati kal tur bik tan Transport complex aṭanga MST bus chhuah hun chu darkar khatin an sawn hma nghal a ni.

Aizawl-Sairang inkarah MST bus a tlan hnuah rêla chuang leh chuang tur khualzinte phurin MST bus vawi 79 an tlan tawh a, mi 3,196 an phur tawh a ni.