Pualrêng Wildlife Sanctuary-a thing zai rutu mi paruk man

Pualrêng Wildlife Sanctuary-a thawkte chuan October 30, 2025 khan Sanctuary chhunga thing zai rutu mi paruk an man a, thing an zaina hmanrua leh thing zai sa eng emaw zat an man bawk.

Pualreng Wildlife Sanctuary-a thawkte hian an thu dawn bawhzuiin October 27, 2025 aṭang khan Sanctuary chhung enfiahin an thawk chhuak a; hmun pakhatah camp an hmu a, enfiah nghalin, a bulah thing zai sa 150 an hmu chhuak a ni.

Thing zai rutute chu Thankhama, Bawngkawn, Laldawngliana, Zuangtui, Lalruatfela, Chhanchhuahna Khawpui, Lallawmsanga, Sesawng, Thanliana, Zuangtui leh Daniel Laldinthara, Saipum te an ni a; EFCC department mite chuan nimin khan Kolasib District Court-ah an hruai.

Thing zai rutute hian riahna camp-ah hian ei tur, thing zaina hmanraw chi hrang hrang, solar plate leh thil dang eng emaw zat an kawl a, chu'ngte chu an man vek. Thing zai rukna atan hian chainsaw pali an hmang a ni.