MNF-in total bandh an huaihawt; 'Kan tawpna tur a la ni lo' - MNF

MNF party chuan Mizoram sorkarin Forest (Conservation) Amendment Act (FCAA), 2023 a pawm (adopt) duh loh lantirna atan nimin zing dar 6 aṭang khan Mizoram hmun hrang hrangah total bandh an huaihawt a; tlai dar 4 thleng kalpui tur ni mah se, chawhnu dar 1-ah an titawp. MNF hotute chuan, total bandh chu FCAA an do tawpna tur a nih loh thu an sawi.

MNF total bandh avang hian sorkar pisa leh pisa dang hrang hrang, zirna-inte leh dawrte khar vek a ni a, total bandh-in a huam loh leh phalna nei bak khawlaia veivâk hmuh tur an awm lo. Phalna nei lo, kaltlang luih tum avanga dan buai ngai an awm loa hriat a ni.

Bandh huaihawt laiin khawlaiah mipui an chhuahvah loh nan MNF mi leh sate khaw chhung hmun hrang hrangah an duty a, an duty-na hmunah venhimna hna thawktu police-te pawh an duty tel ve zel. Bandh chu mipuiin an zâwm ṭhaa an hriat avangin MNF chuan chhun dar 1-ah an titawp a, an duty-na hmuna an ṭawngṭai rual hnuah an ṭin darh.

Total bandh tihtawp a nih hma hian MNF treasurer Lalruatkima chuan Mizo Hnam Rûnah thuthar thehdarhtute a kâwm a; mipuiin total bandh an thlawp ṭhat avanga an lawm thu a sawi.

MNF Treasurer chuan, an total bandh zaha thlawptute chungah an lawm thu sawiin, "Tihluih ngai pakhat mah an awm lo. Sorkar chungah pawh kan lawm tak zet, an thlawp tih loh theih a ni lo a, sorkar office-te kharin, function pawh buatsaih a ni lo. Political party leh NGO-te pawhin min thlâwp ṭha a, ziaka min thlawp thu tichhuakte an awm a, kan lawm tak zet. Sikul leh office kal luih tum, dan buai ngai an awm lote hian FCAA kan duh lohzia a lantirin kan hria a, a ropui kan ti," a ti.

FCAA-in nghawng tam tak a neih thu sawiin Lalruatkima chuan, "India sorkar leh Pu Laldenga ten inremna an ziahah hian Mizoram hi Mizote tan a nih zel theihna atan Article 371G-ah land transfer leh ownership chungchanga kan thuneihna telh a ni. Eng ang pawhin hausa mah se, Ambani pawhin kan ramah ram an rawn nei thei lo. Kan hnam pasalṭhate zar a ni a, ṭhangtharte'n a ṭhatzia an la rawn hmu chho dawn chauh," a ti a; Mizote tana dan ṭha lo chu MNF-in an do zel dawn thu a sawi.

Lalruatkima chuan, FCAA hmangin sorkar laipuiin Mizorama ramngaw leh nungchate defence leh strategic movement atan forest clearance ngai loin an hmang thei dawn tih sawiin, "Hei hi kan ram leh hnam tan a ṭha lo tak zet a ni," a ti.

MNF Treasurer chuan, FCAA pawm lo tura Mizoram sorkar an ngenna a hlawhtlin hma chu an chhunzawm zel dawn tih sawiin, "MNF kan sorkarin FCAA duh lohna resolution kan pass tawh a, vanduaithlak takin a pawmna ZPM sorkarin an pass. Kan him zel theihna atan MNF chuan hma kan la dawn a, FCAA pawm a ni hi pawi kan ti. Kan party chuan ngaihtuah ṭha leh tura ngenna Assembly Speaker hnenah kan thlen tawh. Total bandh hi kan tawpna tur a ni lo a, a hlawhtlin hma chuan kan bawhzui dawn," a ti a; FCAA pawmna chu sorkarna an chan hunah an siamṭhat ngei dawn thu a sawi bawk.