Vawiinah MNF total bandh

MNF party chuan Mizoram sorkarin Forest (Conservation) Amendment Act, 2023 a pawm (adopt) duh loh lantir nan vawiin hian zing dar 6 aṭanga tlai dar 4 thleng Mizoram pumah total bandh an huaihawt dawn a; bandh an huaihawt tur hi thláwp turin mipui an ngen.

MNF chuan, FCAA vanga total bandh neih a ngai chu pawi an tih thu sawiin, "Dan sakei, Zoram pumpui forest nei loa min chhuahtu leh kan inhumhimna dan hlu ber Art. 371G engmahloa chantirtu FCAA hi kan hnâwl ngam a ngai. Hemi ngiat nana total bandh ni October 29, 2025, zing dar 6 aṭanga tlai dar 4 hi min thlâwp a, duty-a feh chhuakte min zahsak turin mipui kan ngen a ni," an ti.

MNF party huaihawt total bandh hi Mizoram pumah neih tura tih ni mah se, Mamit district-ah erawh chuan Dampa bial MLA by-election tur avangin huaihawt a ni ve dawn lo.