Tlawng leh Chhimtuipui IWTproject tihfel ṭêp a ni - Waterways Minister

Union Ports, Shipping & Waterways minister Sarbananda Sonowal chuan, ram chhunga lui dunga inkalpawhna tihhmasawn nan Mizorama lui pahnih - Tlawng leh Chhimtuipui hmasawnna tur Inland Water Transport project hmalakna tihfel ṭêp a nih tawh thu a sawi.

Vawiin hian October 31 thleng awh turin India ramah India Maritime Week hman a ni dawn a; Week pual hian Ports, Shipping & Waterways minister Sarbananda Sonowal chuan thuchah tichhuakin, ram chhunga lui dunga inkalpawhna tihhmasawnna tur zingah Mizoram a tel ve tih a sawi a, "Mizorama Tlawng lui leh Chhimtuipui lui hmasawnna tur project pawh DPR tihfel mek a ni a, hei hian ram chhunga inkalpawhna turah leh ram dang pawhna kawngah pawh hmun pawimawh tak a chang dawn a ni," a ti.

Sarbananda Sonowal chuan, "Tlawng lui leh Chhimtuipui lui hmasawnna turin Khawthlangtuipui leh Tuichawng luite chu kawtchhuahah siam a ni ang a, heng hian hmasawnna lian tak a thlen dawn a ni," a ti a; lui dung tihhmasawnna bakah hian, lui leh a chhehvela awmte chu khualzinte mit fûkna a nih theih nan chei mawi a nih dawn thu a sawi.

Ports, Shipping & Waterways Minister chuan, India hmarchhak state dangah pawh an lui dung tihhmasawnna turin chak taka hmalak mek a nih thu a sawi a, "Chu'ng zingah chuan Brahmaputra, Barak, Dhansiri leh Kopili te chu a hmingthang zual a ni a, heng lui kalkawng tihhmasawnna hian ram chhunga chengte eizawnna a pek bakah, ramin nasa takin hma a sawn phah dawn," a ti a; Narendra Modi kaihhruai sorkar laipuiin India hmarchhak bial a dah pawimawh a, hmarchhak hmasawnna atan theihtawp chhuah a nih thu a sawi bawk.