Kuminah TB vei 1,870 hmu tawh; TB vangin mi 121 an thi tawh

Kumin 2025-ah January 1 aṭanga October 10 thleng khan Mizoramah ngawr (tuberculosis) vei mi 1,870 hmuh chhuah an ni a, TB vangin mi 121 an thi tawh.

National TB Elimination Programme aṭanga thu dawn danin, January 1 - October 10, 2025 chhung khan Mizoramah TB vei rinhlelhawma ngaih mi 97,647 endik an ni a, chu'ng zinga mi 1,870 chuan TB an vei tih hmuh chhuah niin, mipa 1,126 leh hmeichhia 744 an ni.

Kumina TB vei hmuh chhuah tawhte chu kum 14 chung lam mi 1,761 leh kum 14 hnuai lam mi 109 an ni a; TB vei hmuh chhuah zingah mi 211 chu TB leh HIV vei kawp niin, a bika enkawl ngai, MDR-TB (multi drug resistant-TB) vei mi 121 an awm bawk.

Kumin 2025-ah hian Mizoramah TB vangin mi 121 an thi tawh a; TB vei hmuh chhuah zinga 82% chu enkawl dam an ni thung.