Champhai district-ah 2024 aiin 2025-ah END-in ruihhlo an man tam tawh zawk

Champhaia Excise & Narcotics department chuan kum khat leh thla kua kal ta chhungin zu leh ruihhlo kaihhnawihah mi 556 manin, thubuai 636 an ziak lut. Champhaia END-in kum 2024 thla 12 chhunga zu leh ruihhlo an man aiin, kumin 2025-a thla 9 chhunga an man a tam tawh zawk.

Excise & Narcotics minister Lalnghinglova Hmar chuan October 18, Inrinni khan Champhai Circuit House-ah thuthar thehdarhtute a kâwm a; January 2024 aṭanga September 2025 thlengin Champhai END mi leh sate'n zu leh ruihhlo kaihhnawihah thubuai 636 an ziah luh thu leh mihring 556 an man thu a sawi.

END Minister tarlan danin, Champhaia END-te'n kum 2024 chhung khan heroin kg 8.783 leh methamphetamine kg 86.835 an man a, January-September 2025 chhungin heroin kg 12.616 leh meth kg 87.639 an man. Kum 2024 chhungin sapzu ûm 733 an man a, kuminah thla 9 chhungin ûm 733 an man a ni.

Kum 2024 chhung khan Champhai END-te'n ruihhlo kaihhnawihah mi 95 manin, NDPS Act hnuaiah thubuai 71 an ziak lut a; kumin 2025-ah January-September chhungin mi 87 an man a, thubuai 87 an ziak lut bawk.