KHAWTHLIR

Phone number dah turin hriattir

Lunglei SP J Lalmuankima chuan thupek tichhuakin, lirthei neitute chu an lirtheiah November 2, 2025 ral hmain anmahni biak pawh theihna phone number dah vek turin a hriattir. Thupek zâwm lote chu dan anga hrem an nih dawn thu leh November 3, 2025 aṭangin thupek hi khauh taka kenkawh a nih dawn thu SP chuan a tarlang.

Police-in zu man

Kawnpui police-te chuan October 19, Pathianni zan khan Zophei, Kawnpui Hmarvengah lirthei MZ-05 A-6397 aṭangin sap zu eng emaw zat an man. Zu mante chu - Iconic White báwm (case) 54, After Dark case 37, Green Label case 30 leh AC Black case 14 a ni a, a vaiin Rs 7,12,800 hûa chhût a ni. Zu phurhna lirthei khalhtu a tlanbo hman avangin police-te'n an man tel lo.

Zu leihbua

New Vervek Village Task Force on Ruihhlo Do chuan October 18, 2025 (Inrinni) khan New Vervek VC kaihhruaina hnuaiah zin veivâkte aṭanga an man rakzu litre 470 an leihbua. New Vervek Task Force chuan, Sakawrdaia YMA General Conference neih turah ruihhlo tel lo leh boruak nuam tak hnuaiah mi tinin hun an hman theih nan ruihhloah an thîkthu a chhiat dawn thu an tarlang.

PC candidate tur K Zahmingthanga

Peoples' Conference party chuan November 11, 2025-a Dampa bial by-election awm tura an candidate atan K Zahmingthanga, Sakawrtuichhun an ruat thu an tarlang. PC party tarlan danin, K Zahmingthanga hi PC vice president ni lai a ni a, vawiinah nomination a thehlut dawn a ni.

MLA-in buhfai sem

Zanina Sakawrdaia YMA Inkhawmpui Lian ṭan tur pualin bialtu MLA Lalchhandama Ralte chuan Sakawrdaia chhungkaw hrang hrang hnenah buhfai a sem. MLA-in buhfai a sem hi YMA-te'n an sempui a ni.

Observer-te biak theihna tichhuak

Dampa assembly constituency by-election neih turah zawhna, harsatna leh hriat duh nei tan Election Commission of India-in a ruat general observer MT Reju (7085471015) leh liaison officer Dr Lalnghakmawia Thangluah (9862655646) te, police observer Sabya Sachi Raman Mishra (7085472326) leh liaison officer Zoramsanga (9612449229) te, expenditure observer Shyam Kumar (7085471318) leh liaison officer Alex Lalhriatpuia Sailo (7005648430) te biak theih an nih thu sorkar thuchhuahin a tarlang.