YMA Inkhawmpui Lian ṭan dawn

YMA Inkhawmpui Lian vawi 75-na chu zanin hian Sakawrdai khelmuala pandal sak, Chengkawlawn Rûnah ṭan a ni dawn a; October 23, Ningani zanah a ṭiak dawn.

YMA Inkhawmpui Lianah hian zaninah palai lawm inkhawm neih a ni dawn a; lawmman chi li - ramngaw leh nungcha humhalh ṭha, tuihna humhalh ṭha, lui dung humhalh ṭha leh YMA Chanchinbu la ṭha te hnenah lawmman hlan a ni ang a, hruaitu hlunte hnenah chawimawina hlan a ni ang. Central YMA general secretary Prof. Malsawmliana'n Annual Report pein, finance secretary MS Ralte-in Finance Report a pe dawn bawk.

Naktukah nilêngin pandal-ah rorel palaite'n ro an rêl ang a, rorel palai ni lote tan Sakawrdai Community Hall-ah variety programme hman a ni ang. Naktukah pandal-ah CYMA office bearer thlan a ni dawn a, OB post paruk atan nominee mi 12 an awm a ni.