Vanduaina thlengah mi 2 an thi

October 20, Pathianni leh nimin khan Mizorama vanduaina thleng pahnihah C Lalruatkima, Lunglei Bazar Veng leh Vanneihchhunga, Champhai Zion Veng an thi.

C Lalruatkima (28) s/o C Lalrintluanga, Lunglei Bazar Veng chu Pathianni tlai dar 5 vel khan Lengteng Hostel Building, Mizoram University (MZU) aṭangin a tla a, Ebenezer Medical Center-ah hruai ni mah se, a hliam tuar loin a thi.

Thu dawn danin, C Lalruatkima hi MZU Department of Mass Communication-a research scholar (Ph.D ti mek) a ni a; October 18 tlai khan puan an phona ṭhin panna tura thingtuai an dawh chu a zawh laiin a tliak a, an hostel building chawng lina aṭangin a tla a ni.

Vanneihchhunga (40) h/o Lalfakzuali, Champhai Zion Veng chu nimin chawhnu dar 2 vel khan an hnathawhna hmunah lungin a delh a, a hliam tuar loin a thi.

Vanneihchhunga hi GM High School sak ṭhat mekah a inhlawh a, hna an thawh laiin a awmna chhak lam aṭanga lung tlain a delh a ni. Theihtawpa buaipui a nih hnuah lak chhuah a ni a, damdawi-in panpui ni mah se, chhan theih lohin a thi a ni.