Kolasib dist-ah kawng chhia vangin ni 3 chhung kawng an dang dawn

Mizoram Tipper Association, Kolasib District Hqrs leh Joints Action Committee ṭang dun chuan kawng chhiat vangin Vairengte-Sairang leh Bairabi-Kolasib inkar kawngte chu October 23-26, 2025 chhung dan an tum. NHIDCL leh Mizoram sorkar chu chak zawka kawng chhe lai thawm ṭha turin an phût.

MTA Kolasib leh JAC chuan nimin khan thuchhuah siamin, Mizoram châk lakna kawngpui Vairengte-Sairang leh Bairabi-Kolasib inkar kawng khuar laite chu thawm ṭhat mek ni mah se, hna thawh a chak tawk loh thu an tarlang a, "Tun anga an thawh reng chuan Mizoram kawngpui pawimawh hi kumin mai pawh ni lo, nakkum fûr hma pawhin an siam zawh a rinawm loh a, nakkumah phei chuan tun aia a chhiat nasat zawk a rinawm," an ti.

NHIDCL leh Mizoram sorkar chu chak zawka kawng siam tura ngenin pawl pahnih chuan, "Sub-grade aṭanga siam tur leh thawk ngei turin kan phût. Chak taka hna an thawh theih nan leh min ngaihthah em avangin lirtheia eizawngte'n lungawi lohna lantir nan October 23, Ningani zing dar 7 aṭanga October 26, 2025 tlai dar 4 thleng Vairengte-Sairang inkar, Bairabi-Kolasib inkar Kawnpui-Durtlang inkar kawngah lirthei tlan lo turin kan kan inhriattir a ni," an ti.

MTA Kolasib leh JAC chuan an hmalakna thlawp turin mipui an ngen a; kawng an dan chhungin ambulance, magistrate, emergency duty-te leh ṭul bik thila mahni awmna veng VC/YMA hriatpuina lehkha neite chu hriatthiam an niuh tur thu an tarlang.