Kolasib Diakkawn mipuiin an venga National highway kawngpui an phiat fai

Kolasib Diakkawn Village Council leh tlawm­ngai pawlte bultumin nimin khan an veng paltlang national highway kawng­pui phiah fai a ni.

Kawngpui phiah fai hnatlangah hian mi ṭhahnem tak an thawk chhuak a; an veng paltlang NH a khu lutuk a, mipui hriselnain a tawrh hlauhthawnna avangin an phiat fai a ni. Kolasib Diakkawn VC leh NGO-te chuan, an thil tih chu politics zawnga inbeihna leh mi dang tihmualpho tumna a ni lo tih an tarlang.

Diakkawn VC leh NGO chuan thuchhuah siamin, UDPA depart­ment-in khawpui fai inelna, Mizoram Clean­liness Competition a buatsaih chho ṭan a, chumia inbuatsaihna atan chuan Kolasib khawpuiah VC tinte veng fai inelna an kalpui mek tih an tarlang a, "Kan khawtlang kan fai zual theih nan hmalakna hrang hrang neih a ni. Kan veng paltlangtu NH a chhiain vaivut a tam em em a, faina lama hma kan lak mekah vaivut then hi a ṭulin kan hria a ni," an ti.

NH enkawltu NHIDCL-in NH siam turin Jandu Construction Company an ruai tih tarlangin Diakkawn VC leh NGO chuan, "Working season a nih veleh kawngpuiah bitumen phah an tum a, March 2026-ah an hnathawh tur chin zawh vek an tum thu an sawi," an ti a; kumin bikah Mizoram district hrang hrang zingah Kolasib district chu ruahtui dawng tam ber a nih thu an tarlang.

Diakkawn VC leh NGO chuan, kawng siamtu contractor-te'n thla thar aṭangin kawng chhuat phah hna thawh an tum thu an sawi chu dawhthei taka an nghah hram hram thu an tarlang a, "Kan ṭhahnemngaih luatah kawng siam tur contractor-te tithlabar zawng leh awm tinuam lo ang chia che lo turin khawtlang mipui pawh kan inngen tawh a ni," an ti.