PHC pathumin NQAS an hmu thar

India rama sorkar damdawi-in ṭha bik tehna, National Quality Assurance Standards (NQAS)-ah primary health centre pathum - North Vanlaiphai PHC, Rabung PHC leh Farkawn PHC an tling thar.

National Health Mission, Mizoram tarlan danin, NQAS-ah hian North Vanlaiphai PHC-in 92.63%, Rabung PHC-in 86.68% leh Farkawn PHC-in 80.78% an hmu. NQAS national certification hmu tur hian endikna leh tehnaah 70% hmuh tlin a ngai a ni.

Heti hian Mizorama sorkar damdawi-in 52-in NQAS national certificate an hmu tawh a; state level certification hmu tawh sorkar damdawi-in 15 leh HWC sub-centre 21-in national level assessment an dil mek a ni.