Tlawng chungchangah inrâwnkhawmna buatsaih

Irrigation & Water Resources department chuan nimin khan Planning conference hall-ah Tlawng lui humhalhna leh tuihna tihchak lehzualna tur 'Rivitalising Tlawng River through Springshed Management & Allied Strategies’ chungchangah inràwnkhawmna an buatsaih a, chief minister Lalduhoma'n a hmanpui.

Inrawnkhawmnaah hian sorkar department hrang hrang hotute bakah, Mizoram University, Central YMA, Save the Riparian, Centre for Environment & Social Justice, Project Save Tlawng aiawhte an tel a; mithiamte paper present an zirho a ni.

CM Lalduhoma chuan, inràwn-khawmna hlawhtling tak a nih theihna tura thiamna leh tawnhriat ṭha tak tak nei Brahmaputra Board, IIT Roorkee leh Public Health Engineering department-te an tel chu a lawm thu sawiin, lui luan dan leh a dinhmun dik tak hriat theihna turin State Water Informatics Centre kalpui mek a nih thu a sawi.

Mizoram sorkarin Brahmaputra Board leh IIT Roorkee te nen thawhhona ṭha tak an nei mek tih sawiin Lalduhoma chuan, "Mat lui zirchianna, nungchate humhalhna, lui dunga eizawnna siam leh lui dung inkalpawhna ṭha siamna turin ‘Mat Valley Integrated Water Resource Management and Climate-Resilient Irrigation Project’ kalpui mek a ni," a ti.

Chief Minister chuan, Mizoram sorkarin ‘Mizoram (Protection of Rivers) Act, 2023’ a pawm tawh thu sawiin, "Tuihna leh lui humhalh kawngah hmalakna hrang hrang awm ṭhin mah se, khawpui ṭhang zelah kan tui mamawhna a pun zel avang te, ramngaw ṭhiah vangte leh sik leh sa inthlak danglam nasa avangtein Tlawng lui pawh nasa takin a nghawng mek," a ti a; inrawnkhawmna chuan Tlawng lui leh a chhunga cheng nungchate humhalhna leh hmasawnna inbûk tâwk thlentirna turin hmasawnna a thlen a beisei thu a sawi.