Fish Festival huaihawtna tur nuai 15 hlan

South Tuipui bialtu MLA Jeje Lalpekhlua chuan nimin khan Tuipui South Branch YMA hnenah Pradhan Mantri Matsya Sampada Yojana (PMMSY) hnuaia Fisheries kaihhnawih hmanga intihhlimna chawisanna (Promotional Fisheries Activities) tura ruahman cheng nuai 30 aṭangin first instalment nuai 15 a hlan. Tuipui South khua hian December 2025-ah Mizoram pum huap Fish Festival an buatsaih ang.

Tuipui South khua hi a hma chuan Tuipui-D tih a ni ṭhin a, Rural Development & Administration department-in September 8, 2025-a hriattirna a tihchhuah angin Tuipui South tia thlak a ni.

Jeje Lalpekhlua chuan, Tuipui South chu Mizorama sangha humhalh ṭha berte zinga mi a nih thu a sawi a, "Khawtlang hruaitute leh Fisheries department thawhona zar a ni," a ti. Sum an inhlan tâk chu duan a nih ang ngeiin, fisheries kaihhnawih hmanga intihhlimna tihhmasawnna atan hmang turin a chah a; sorkar hmalaknate chu sawisel mai lo a, khawtlang tana ṭha tur a nih chuan ṭawiawm zel turin a ngen.

Kumin December thlaa Tuipui South khuaiin Fish Festival an huaihawt tur chu ṭha a tih thu sawiin Jeje-a chuan, a hlawhtlin nan theihtawp chhuah turin khawtlang mipui a chah a; Fish Festival-a tel turte'n harsatna awm loa Tuipui South an pan theih nan kawng thawm ṭha turin Border Roads Task Force a biak nghal thu a sawi.

PMMSY hnuaia Promotional Fisheries Activities atana hman turin kum 2023-24 chhungin cheng nuai 50 ruahman a ni a; sorkar laipuiin 54% tumin, state sorkarin 6% leh beneficiary-te'n 40% an tum dawn. MLA hian Tuipui South YMA hnenah central leh state sorkar tum tur cheng nuai 30 aṭangin first instalment nuai 15 a hlan a; lui dung leh a chhehvela intihhlimna chi hrang hrang chawisanna tur - homestay, tourist lodge leh lawng chung neite siamna atan hman tur a ni.