Transport Minister-in Hnahthial DTO a hawng

Hnahthial District Transport Officer (DTO) pisa chu nimin khan Lalnu Ropuiliani Hall bulah Transport minister Vanlalhlana'n a hawng a, Hnahthial DTO code MZ-11 chu a tlangzarh nghal.

Vanlalhlana chuan, harsatna eng eng emaw avangin duh angin Hnahthial DTO an hawng hma thei lo tih sawiin, "DTO office hawn tak hi mipui, a bikin lirthei khalh turte harsatna tam tak sukiangtu a nih ka beisei. Mipui tana thil lawmawm tak a nih rualin, dan zâwm lote tan thil huphurhawm tak tur a ni," a ti a; lirthei neitute chu buaina an tawh loh nan license leh lehkha pawimawh dangte felfai tak nei reng turin a chah.

Transport Minister chuan, tuia inkalp-awhna tur, Inland Waterways Transport-ah hmalak ṭan mek a nih thu sawiin, chuta tan chuan tuikhuah sa pahnih - Serlui-B leh Tuirial te chu thilthlai mek thu a sawi a, "Tunah hian central lamin an rawn enfiah tawh a, hmalak zui dan tur ngaihtuah mek a ni," a ti.

Bialtu MLA Jeje Lalpekhlua pawhin thu sawiin, DTO chu Hnahthial mipui nghahhleh em em a nih thu a sawi.

Transport director R Lalram-mawia tarlan danin, Hnahthial DTO code chu MZ-11 a ni a, lirthei MZ-02 registration nei tawh, MZ-11 a thlak duhte tan kum khat chhung hun an hawn a ni dawn, Lunglei DTO aṭangin No Objection Certificate lak hmasak tur a ni.

Hnahthial DTO hawnna inkhawm hi Transport secretary Zosangliana'n a kaihruai a; Hnahthiala sorkar department hotu te, khawtlang hruaitute leh pawl hrang hrang hruaitute an tel. District bawrhsap K Vanlalruati pawhin thu a sawi. Hnahthial DTO pisaah hian thawktu pakua an awm dawn a ni.