KHAWTHLIR

HSLC leh HSSLC

Mizoram Board of School Education chuan kum 2026-a High School Leaving Certificate leh Higher Secondary School Leaving Certificate exam hun a tichhuak. HSLC exam chu February 19-ah tur niin, HSSLC exam chu February 9-ah ṭan tur a ni a; theory bik chu March 16-ah zawh ve ve a ni ang.

MLA-in EMRS tlawh

Aizawl South-II bialtu MLA Lalchhuanthanga, ZPM treasurer ni bawk chuan nimin khan a bial chhung Tlangnuama Eklavya Model Residential School (EMRS) a tlawh a, an harsatna leh hmasawnna turte a enpui. Lalchhuanthanga chuan, Tlangnuam venga EMRS a awm chu veng mipui tan a hlu tak zet tih sawiin, "A panna kawngin hma a sawn theih nan theihtawp chhuah zel ka tum," a ti a; EMRS chhawr ṭangkai ngei tum turin veng mipui a chah.

EFCI Council

Evangelical Free Church of India (EFCI) rorelna sâng ber dawttu Executive Council vawi 113-na chu October 15-16, 2025 chhung khan Khawlian EFCI biak-in neih a ni a, rorel palai 63 an tel. Rorel inkhawmah hian moderator Rev. Rohminglien Pakhuongte-in EFCI dân bu, Consti-tution & Bye Laws (2025 Edition) a tlangzarh.

MGNREGA sawiho

Rural Development & Administration minister Prof. Lalnilawma hoin October 16-17 khan a pisaah District Rural Development Office leh Rural Development Block Office-a thawktute'n ni 100 inhlawhna (MGNREGA) chungchangah inrâwnkhawmna an nei. Minister chuan, MGNREGA sum hmanga hnathawhte chu thingtlang mipui tana ro tling leh chhenfakawm a nih theih nan department-a thawktute chu ruahmanna ṭha zawk nei turin a fuih.

Hmalakna thlirho

Lok Sabha MP Richard Vanlalhmangaiha hoin nimin khan Champhai District Development Coordination and Monitoring Committee (DISHA) an ṭhukhawm a; sorkar department-te'n centrally sponsored scheme hrang hrang an kalpui dan leh hmachhawpte thlirho a ni. Lok Sabha MP chuan, sorkar scheme kalpuitu department hotute chu theihtawp chhuah ṭheuh turin a chah.