Vanghmunah Cultural Meet an hmang

Mizoram Art & Culture depart-ment leh Tripura Group YMA buatsaihin nimin khan Vanghmun, Jampui, Tripura-ah Cultural Meet hman a ni a, YMA branch hrang hrang an tel. Meeting hi Art & Culture minister C Lalsawivunga'n a hmanpui.

Cultural Meet-ah hian Tripura Group YMA chhunga YMA branch hrang hrang - Vanghmun, Hmunpui, Vaisam, Phuldungsei, Hmawngchuan, Sabual, Bangla Zion, Behliangchhip, Tlangsang leh Tlaksih te an tel a, Mizo hnam lâm leh zai chi hrang hrang entir a ni.

C Lalsawivunga chuan, Mizote ram hrang hrangah an awm tih sawiin, "Inrêlbâwlna ramriin min kardan mah se, insuihkhawmna rilru pu chunga thinlunga inpumkhat zel tur kan ni," a ti a; Mizo nun ze mawi vawnghim a, aia upa zah kawngah ṭan la zel turin a chah.

Art & Culture Minister chuan, Mizote chu khawi hmunah pawh awm se, hnam anga ṭanrual a pawimawh tih a sawi a, "State dangah awm mah u la, in tan Mizoram sorkar a ding reng dawn," a ti a; hnam dangte'n Mizote an zahna turin tam a ngai tih sawiin, "Kan hnam kan pun theih nan nupa kara nau piang kan pun a ngai a, tlang takin he lamah hian ṭan kan a lak a ngai," a ti.

Jampui Cultural Meet hi Tripura Group YMA vice president Chawnghmingthanga'n a kaihruai a; Mizoram aṭangin Art & Culture joint director F Lalthanmawia pawh a tel. Tripura Group YMA huam chhungah YMA branch 19 an awm a, member 3,000 vel an awm mek a ni.